I CHJASSI DI U CUMUNU

In un bigliettu pubblicatu ultimamente nant’à u so blog (http://www.pgp-web.com/cn/?p=2168) Petru POGGIOLI ammenta e « gambittate » è e « sgambittate » (figure di a ballera classica) ch’elle si provanu à fà e varie cumpunenti di u bloccu naziunalistu, in stu periudu di priparazione di e territuriali di u mese di dicembre 2015.

In seguita mette in evidenza duie cose chì tutti i candidati s’hanu persu di vista per avà :

– l’elettori volenu cunnosce i punti maestri di a so azzione à vene : u famosu prugramma… scrittu bellu spessu nant’à u scornu di u tavulinu ;

– l’elettori volenu sapè a so strategia per u sicondu giru : per un dettu l’aggruppamenti da mette in opara per ghjunghje in testa è per buscassi a prima magiuritaria di 9 eletti, l’altri 42 essendu scelti in funzione di u risultatu ottinutu.

Allargarahju a mo riflessione à a riprisintazione pulitica sana sana, chì mi pare ghjustappuntu adatta à tuttugnunu…

À diritta, hè stata urganizata à l’appiattu una riunione ma unepoche d’indiscrezione sò state palisate cum’ellu si pudia aspittà, cù u rimore di i mutori di i vitturoni annant’à a gravetta in a friscura d’una nuttata d’istatina di u Curtinese. Custì – nurmalmente – avarebbemu da avè trè liste.

À manca, ci n’avarebbe da esse cinque : quella di u Presidente di l’Esecutivu ; quella chì assuciarebbe à Bonifaziu cù Afà è cù l’agiunta municipale sucialista di Bastia ; quella purtata da i dui candidati sfurtunati di l’ultime municipali d’Aiacciu è di Bastia ; quella furmata da l’addunita pussibbule trà Corse Sociale Démocrate è u MCD (riprisintatu da u Presidente di u SYVADEC) è per compie ci sarebbe una lista cumunista.

Ind’è i naziunalisti, liste ci ne pudarebbe esse trè : CORSICA LIBERA, i naziunalisti muderati è po quelli chì ùn li garbanu tantu e sgambittate ammintate anz’ora.

È di sicuru ùn ci vole micca à sminticà u FN.

Ciò chì ci darebbe in tuttu 12 liste, 612 candidati… è per avà… mancu un prugramma… Si pò quantunque spirà chì u mese di sittembre, u mese di a scopa chì fiurisce, sarà dinò quellu di u spuntà di i prugrammi.

Ma cumu spiigà st’agitazione generale chì parte in tutti i sensi à l’ora d’appruntà l’elezzione ? Vogliu prupone quì duie letture : una fundata nant’à a Guerra Picroculina, quill’altra nant’à a permanenza di a Maledizzione di i Farisei.    

I – DA RAMMINTÀ

Da chì u lettore ùn si perdi ci tocca à rivene annant’à ‘sse duie nuzioni.

1 – A guerra Picroculina

Hè un fattu ammintatu da u GUARGANTUA di Rabelais scrittu à u sedecesimu seculu.

In u mentre di un cuntrastu lucale nasce una baruffa trimenda trà i pastori di Grandgousier (« grands gosiers » in vechju francese) è i cusì detti bastillaghji (« fouaciers » o « boulangers ») d’un paese vicinu. I torti ùn eranu forse tutt’à fattu spartuti : i pastori si vulianu cumprà e bastelle (« les fouaces » ou « fougasses ») ; senza spiigazione alcuna i bastillaghji rispondenu à i pastori cù unipochi d’insulti è i menanu ancu. Face chì s’ingattivisce u cunflittu : i pastori menanu anch’elli è si piglianu e so bastelle, ma e paganu. Si capisce chì à sti punti quì a sorte hè favurevule à i pastori.

Ma invece di calmà stu principiu di lita senza impurtanza, u rè di i pastori, PICROCOLE, ne chjama à a mubbilizazione generale è assalta u paese di Grandgousier senza mancu dichjaralli a guerra. Per dà capu à e cunsiquenze di a guerra, u rè di Grandgousier manda un imbasciadore chì cerca di fà sente ragione à PICROCOLE. Quessu pigliendu a dimarchja per dibbulezza, s’impegna ancu di più ind’è a battaglia. Ma hè cusì disurganizata a so armata chì ùn pò chè perde. Tandu si ne scappa mezu chè spugliatu.

Grandgousier riagisce cum’è un rè : mansu mansu cù u populu, ùn si vole impatrunisce di u duminiu di PICROCOLE chì tuccarà à u figliolu è punisce i rispunsevuli di a guerra, volesi dì i bastillaghji è i cunsiglieri pessimi di PICROCOLE.

Si capisce dunque chì u termine « Guerra Picroculina » hè un modu di sprime da qualificà un cunflittu lucale di poca impurtanza ma gestitu di manera sprupusitata da l’omi cugnumati custì i « grands gosiers » chì ùn sapianu vede l’essenziale, vene à dì distingue e cose impurtanti da e cose di poca primura.

2 – A Maledizzione di i Farisei

Issu testu custì hà 2000 anni è si trova in u Vangelu di Matteiu (Novu Testamentu)

Ne vogliu cità un strattu chì và cù a nostra interrugazione : « Guai à voi, scribi è farisei falsi ! Perchè chì… dite : S’è no avissimu campatu in tempu di i nostri babbi, ùn l’avariamu micca righjunti pè sparghje u sangue di i prufeti. Tistimuniate cusì contr’à voi stessi chì site i figlioli di quelli chì hanu tombu i prufeti. È puru culmatela a misura di i vostri babbi ». (Matteiu 23-29 à 23-32).

Sò ghjente cunvinte di e so sapienze riligiose i Farisei è sò in l’usservanza tutale di a Lege Musaica, ciò chì i rende eccessivi. Infatti, tinendu contu di ogni minuzia di a Lege, ne ghjunghjenu à disprizzà a povara ghjente chì ùn cunnosce ‘ssa Lege è cusì l’impidiscenu di cunnoscela. D’altronde sò elli chì tenenu a magiurità di u Sanhedrin (Ghjuvanni 11-47), vale à dì l’istanza suprana di a cumunità ghjudeia, chì dice a sintenza chì tuttugnunu sà, nanzu chì Pilatu l’accettessi lavendusi e mani.

Ma ogni cosa hè detta ind’è a frasa : « culmatela a misura di i vostri babbi ». Quelli chì hanu tombu i prufeti è i savii, chì sò ghjunti nanzu à Ghjesù chì ci ne parla l’Evangelista, ùn sò i parenti stretti di i Farisei chì ricevenu a Maledizzione. Ma sò i so puredi. I Farisei à quale parla Ghjesù sò l’eredi di quelli chì l’hanu cummessi iss’assassinii è chì l’hanu ancu palisati. Intantu per via di u diterminisimu storicu ùn lu pudaranu schisà u soiu u distinu : fà cum’elli hanu fattu i so antenati è cundannà à Ghjesù.

« A culmaranu a misura di i babbi », saranu cum’è i so antenati è faranu cum’è elli cundannendu à Ghjesù, cum’ellu a li dice Ghjesù stessu in quessu u virsettu.

Si face chì l’espressione Maledizzione di i Farisei hè rilativa à un diterminisimu storicu[1] chì e so radiche e trova in u passatu cumunu d’un gruppu d’omi. Quelli chì u cumponenu ripruducenu i cumpurtamenti tramandati da a so storia cumuna, malgradu a dinuncia ch’ellu ne face.

II – TRASPUSIZIONE À A PRIPARAZIONE DI E TERRITURIALI

1 – A lettura Picroculina

S’ellu si paraguneghja appena cù noi altri, sumiglianze ci n’hè parechje.

Hè lucale a lita : di un puntu di vista naziunale, si tratta di una cunsultazione chì tocca 320 000 persone, volesi dì chì tocca a più chjuca di e future regioni. Quella chì ghjunghje à u penultimu rangu, in pupulazione cum’è in PIB, hè u « Centre – Val de Loire » cù i so 2 600 000 abbitanti. U so PIB hè di 69,6 miliarde d’€ mentre chì quellu di a Corsica hè di 8,2 miliarde d’€. Misuremu a differenza !

Simu propiu for’ di misura : ci sarà forse 12 liste, 612 candidati… è prugrammi pocu è micca s’ellu ùn hè di quì o di culandi calchì sumiglia di prugettu, ghjente incittata, dispute chì ùn si ponu appacià, scatinamentu di i tamburi, aggruppamenti di battaglioni, riunioni pubbliche da fà vede a so forza, ecc…

I cumpurtamenti s’assumiglianu da veru à quelli di i pastori di Grandgousier : « culpacci pulitichi » trà di vicini ideulogichi, à diritta, à manca o ind’è i naziunalisti, prese di pusizioni più da fassi rimarcà cà da custruisce, strategie in tutte e direzzioni, addunite fatte sottu sottu chì ci facenu pinsà à u matrimoniu di a volpe cù u ricciu, etc…

Ma ci manca l’essenziale : ùn si sà e linee maestre di l’azzione futura è ùn sò annunciate di modu chjaru l’allianze di u sicondu giru. Tuttu si face « off » : cumbriccule, telefunate è riunioni più o menu à l’appiattu.

2 – A lettura Farisaica

In stu vintunesimu seculu tuttugnunu dice ch’ellu ci vole à rompe incù l’abbitutine anticogne è incù l’arrangiamenti trà i « clans » è ch’ellu sarebbe ora di fà passà l’interessu di a Corsica nanzu à e liticate di i partiti.

È purtantu tutti cuntinueghjanu à « culmà a misura di i babbi » è à ripruduce cumpurtamenti eletturalisti anticogni.

A diritta chì si dice liberale – si difinisce dunque rispittosa di a vuluntà è di a criatività individuale -, si scrive in un schema piramidale (per ùn dì in un centralisimu dimucraticu) cù dui grandi generali è un giovanu culunellu chì danu a misura à quelli in capacità d’eleghjeli.

A manca – chì pratende di purtà u prugressu di pettu à u cunservatisimu – hè impastughjata in e so cumbriccule di pulitichella chì avarebbenu a so piazza in « Astérix en Corse ». Si sente bè chì u prugressu è a visione muderna ùn hanu u listessu sensu in Corsica chè ind’è Jaurès

I naziunalisti chì da parechji anni avianu ripigliatu u riturnellu di u gruppu famosu chì ci dumandava di ùn andà à vutà per i Grandgousiers ingordi di « fouaces », sò in traccia d’aduprà i listessi cumpurtamenti cà quelli ch’elli dinunciavanu : a ci dice binissimu u bigliettu di Petru POGGIOLI.

Finalmente, i pulitichi corsi, qualsiasi u culore di a so indiatura, ùn la si francaranu da a Maledizzione di i Farisei : ogni cosa ci insegna oghje ch’ella hè ghjunta l’ora per elli di « culmà a misura di i babbi », puru in stu terzu millenne !

3 – Cunclusione

Si cumplettanu e duie letture chì, per disgrazia, sò sempre d’attualità in a nostra isula. Ci vole à ricunnosce chì a riprisintazione pulitica ùn manca d’imaginazione nè per a strategia, nè mancu per e dichjarazioni d’ordine generale, ma ch’ella ùn ci dice tant’affari cuncirnendu e misure cuncrete è l’assi di sviluppu pragmatichi.

È ùn sarà mancu po u PADDUC, divintatu frattempu un ducumentu d’urbanisimu incù un capitulu dedicatu à u sviluppu ecunomicu rinviatu à u sicondu pianu, chì rispundarà à a dumanda, moltu più chì u ducumentu ci prumette una ghjurisprudenza ricca è zeppa, à livellu custituziunale quant’è amministrativu.

I 22 000 « circadori d’impiegu » è e 64 000 persone chì campanu sott’à « a limita di a puvertà », elli, aspettanu sempre. È l’elettori dinò aspettanu.

Spiremu dunque chì u mese di sittembre vidarà fiurisce miraculi di cuntinuti prugrammatichi serii è argumintati è dinò a chjarezza pulitica.

Roger Micheli /  Traduzzione di Michel Frassati

 

 

 

 

 

 

 

 

 

 

[1] diterminisimu : cumpurtamentu umanu chì a causa si pò spiigà per via di u passatu è di u campà di u gruppu.