TRIBUNE LIBRE : E BASE DI L’INTEGRAZIONE

migration

Parlà di cultura è d’integrazione in u 2015, hè piglià u risicu di vede un campu semanticu, purtantu chjaramente indittatu, sterilizà a minima riflessione. Hè dinò avè l’assicuranza di vedesi furmà è opponesi i dui campi ideulogichi chì ùn sarà tantu faciule à sorteci di l’imbrogliu. D’una banda avarete i cusì detti « bobos » chì sarebbenu elli à favore di un mondu multiculturale è di un’affirmazione di e radiche. Di l’altra banda ci truvarete i « fascisti » chì sarebbenu elli per un’assimilazione tutale à u risicu di perde a so naziunalità stessa.

1 – INTEGRASSI À CHÈ ?

À un’epica d’incrispazione internaziunale, di paura riligiosa è cumunitaria, lasciate ogni speranza s’è vo vulete pruduce sfumature o anàlisi. Vulè o ùn vulè, sarete in ogni manera classificatu ind’è unu o ind’è l’altru di sti dui circuli di riflessione.

Ma in Corsica parlà di cultura è d’integrazione hè assai dilicatu, moltu più chì quessa a prubblematica sbocca nant’à una trìplice risposta :

-A prima, quella chì permette à i Corsi di ricunciliassi cù a so cultura spùtica.

-A siconda, quella chì permette à « i ghjunghjiticci di pocu » d’acquistà una cultura tralasciata da a maiò parte di i lucali.

-A terza chì cunsiste à dà à a cultura corsa i mezi di risiste di pettu à a glubbalizazione culturale è à a sparghjera di u « ragiunamentu esagunale » da priservà u soiu u lugiziale di pinsamentu.

Parchè chì daretu à l’integrazione è à a cultura, ci stà una màghjina. Quella di un omu (o di una donna) chì scala è chì spone e so valisge in un scurnarellu di u mondu chì ùn hè u soiu. È chì tandu si trova di pettu à una scelta : cuntinuà à campà sicondu u so modu di campà iniziale o chjappassi quellu di a tarra induv’ellu stà oramai.

2 – A FABBRICA ÙN VIAGHJA PIÙ

In Corsica, da i tempi landani, u prucidimentu di l’integrazione à l’identità di l’isula hè statu simbulizatu da una sintenza : « A Corsica face i Corsi ». Daretu à sta frasa ripituta à l’infinita, si piattanu i fundamenti di a cumunità di distinu, quelli di una cumunità chì s’arremba annant’à e persone chì s’assucieghjanu à una cultura o chì a ricevenu in làscita, tutti pari dananzu à ‘ssu patrimoniu materiale o immateriale.

Ma quessa hè una nuzione aparta chì si ne và in dirotta, maltrattata ch’ella hè dapoi parechji anni. Da e rimarche ghjuste à quelle più o menu tuntine, l’ideia chì bastarebbe à dì ch’ella pò a Corsica integrà tutti i strangeri (chì a so vucazione ùn hè di firmà strangeri) postu chì hè sempre stata cusì ùn tene più tantu a strada.

Una cosa hè sicura, u prucidimentu di l’integrazione ùn viaghja più è cause ci n’hè parechje.

A prima chì ci vene à mente, è chì tuttognunu ammenta vulinteri, hè quella di l’argumentu demugraficu. Difatti una integrazione ùn pò cuncirnà chè una persona à l’identità culturale minuritaria nant’à un tarritoriu bellu difinitu induv’ella ci stà una cultura magiuritaria.

U tassu di fecundità ind’è a nostra isula hè dibbulissimu è a crescita di i ghjunghjiticci hè impurtantissima tutti l’anni. Tuttu què face chì ùn simu più sicuri ch’ella sia a Corsica pupulata ind’è a so magiurità da quelli chì sò ingrandati in un ambiu culturale isulanu spùticu.

È puru daretu à u custatu si trova spessu a suluzione… è a critica !

À sente dì i rispunsevuli sarianu quelli chì sò ghjunti da fora è chì ùn facenu u sforzu d’acquistà a nostra cultura.

Sta tesi ci face pinsà à certi cuntrasti cuntinintali è tuttu què ci rinvia à l’indipendenza ideulogica di pettu à una manera di pinsà in raportu incù ciò chì si passa da mare in là.

UNA INTEGRAZIONE SENZA « L’INTEGRATORI ».

Ma a ragiò ùn ci vularà micca à circalla ind’è quelli chì naturalamente avarianu da esse i « vettori » di a cultura corsa ? Da integrà a ghjente à una cultura, ùn ci vularà micca prima di tuttu assicurassi chì quelli chì hanu a carica di trasmettela sianu in capacità di falla ?

D’una certa manera hè paradussale chì una parte di a pupulazione corsa possi rimpruvarà à i ghjunghjiticci di ùn campà sicondu un modu di campà chì elli stessi ùn approdanu micca.

Chì per taglialla à l’accorta, chì hè a cultura corsa ?

Una lingua, nanzu à tuttu. Ma tandu quantu simu à parlalla ?

Una certa ideia di a sulidarità, di sicuru. Ma noi dinò, ùn emu micca fattu passà u luttisciamentu è u scumpartimentu nanzu à u calore di u quartieru è di e so porte aparte à tutti ?

Una làscita riligiosa, ùn si pò nigà, ancu s’elli ùn la pensanu certi militanti di a laicità. Ma nanzu di pruclamà à voce rivolta chì a Corsica hè una tarra cristiana, quantu ne ferma Corsi praticanti ? Quantu ne firmarà s’ell’ùn hè per assiste à calchì messa o à calchì prucissiò una volta à l’annu, di più pè rispittà un usu culturale chè per campà una fede cultuale ?

Aghju avutu l’occasione di sviluppà u mo discorsu, ma iss’ultimi mesi aghju avutu a furtuna, durante parechje simane, di scuntrà ùn sò quantu abbitanti di Portivechju. È sò statu culpitu di vede chì a cumunità maghrebbina hè quella chì m’hà rammintatu u più a visione d’una sucietà antica.

In u mentre chì i partigiani di una « Corsica, tarra cristiana » si sarranu ind’è i stabbilimenti o ind’è certi caffè induve chì « u prezzu di e buttiglie vi caccia a sete cù l’anchjuve », i vechji maghrebbini elli a si scialanu è a si chjachjareghanu à u pede di e nostre ghjesge.

In u mentre ch’elli vi chjodenu e porte in un paisolu perchè chì u so riposu conta di più cà a so voglia di ragiunà, e vi spalancanu in i quartieri pupulari induv’è vo sarete ancu invitati à manghjà.

Quand’ellu si tene tantu à « fà u brunch » a dumenica, l’altre cumunità elle si cuncoglienu per prigà.

CULTURA 2.0

Ci vole dunque à rilativizà a visione binanria è annant’à ‘ssu chjassu maiò – quellu di l’accessione à una cultura – parechji di quelli chì li si pare d’avè pigliatu l’avanzu, o ancu peghju d’esse digià ghjunti, infatti ne sò guasi à u puntu di partanza.

In cunsiquenza, l’esigenza d’integrazione hè una quistione chì tuttognunu si deve pone, pocu impreme u so locu di nàscita o u so pedigree.

Ci vole chì i Corsi sianu i primi à riacquistà a so storia, a so lingua, i so usi. In sta mossa tamanta, iniziative cum’è « COMPRU CORSU » o « LES EXILÉS » ghjovanu à salvacci.

Hè una sfida per l’avvene, da trasmette a fiaccula à quelli chì ghjunghjenu è chì li tocca à cuncilià ciò ch’elli sò stati è ciò ch’elli sò in traccia di divintà.

Sarà solu pussibbule di cuncilià i dui ? Iè di sicuru, ancu sì u cuntrastu si face arditezza in un cuntestu di riflessione manìchea.

In Corsica, l’hà dimustrata cusì bè a cumunità sarda, puru sì a vicinanza di « l’isula surelle » hà resu sicuramente l’uperazione più faciule.

Aldilà di e nostre ambizioni, cunvene torna di rilativizà u carattare monulìticu di una cultura è di piglià in contu una trasfurmazione perpètua apparagunendula à un mondu chì và troppu in furia, fendu di noi usservadori influenzati.

Ùn hè chè un sbagliu di ghjudiziu chì ci pudarebbe fà pinsà chì un Corsu pò campà sott’à a forza mutrice di una cultura sola sola.

U nostru cunsumu alimentariu hè listessu listessu à quellu di u Pariginu è à quellu di l’agricultori di Burgogna. A nostra manera di vesteci hè cupiata nant’à e tindenze ch’è vo truvate à Londra, Berlinu è Milanu.

Campà in u 2015, à l’epica d’Internet è di a cumunicazione permanente, hè digià campà à u crucivia di e culture in un mondu induve chì u dinumatore cumunu di l’Omu hè sempre più grande.

Scrive un articulu annant’à un blog, hè sapè digià ch’è no ne femu parte.

 

Vincent Gambini /  Traduzzione di Michel Frassati

Publicités